Advertisment
 |
| (Abah Gaul/Abah Gejul) |
Aya deui basa kirata (dikira-kira tapi nyata) nu kapanggih ku Abah, nyaeta kecap darmaji. Sapaliwat mah saperti ngaran jalma “Mang Darmaji”, tapi lain ka dinya maksudna. Poma ulah kasinggung da ieu mah lain nyarita ngaran jalma, tapi istilah basa kirata anu katelah darmaji. Ras inget ka jaman Abah keur sakola, lamun jajan ka warung sok aya nu sisiwo (heureuy), awas tah aya darmaji, cenah.
Harita Abah keur budak, kacaturkeun di hiji sakola nu boga warung, kantin meureun ayeuna mah, mindeng rumahuh tur matak pihawatireun. Baruk teh salila ngawarung, modal beak ari beubeunangan teu luyu jeung jumlah barang anu dijual. Piraku sugan aya tuyul, unggal milang duit ladang dagang gemet, goreng aci jeung sajabana jeung untung mah kalah ka buntung, cek paribasana. Asa piraku aya tuyul mah, komo jaman moderen saperti kiwari asa teu pati usum anu katelah jurig purah nyokotan duit tina sorog dagangan teh.
Mana horeng harita nu dagang gemet, piya-piya, goreng dage jeung sabangsana (sabada ditalungtik) aya keneh nu jajan ngagunakeun jurus darmaji. Naon hartina darmaji? Paingan, dagang teh rugi jeung rugi bae manahoreng aya anu jajan darmaji. Hartina, dahar lima ngaku hiji (anu didahar lima siki diaku atawa diduitanana ngaku hiji). Keun da eta mah jaman Abah keur budak da ayeuna mah moal aya nu model kitu teh.
Tapi anehna, darmaji teh ayeuna mah dipilampah ku jalma pinter tur intelektual. Aya kitu? Ceuk saha euweuh. Ayeuna mah darmaji teh dipilampah ku nu make dasi. Upama bae aya bantuan, teuing mangrupa sasatoan atawa barang jeung nu sejenna. Ari anu dibikeun ka rayat ukur hiji anu didahar kunu mikeunna aya limana. Eta ge sarua darmaji, hartina anu didahar lima, nu dibikeun ukur hiji. Tetelah leuwih jahat darmaji ayeuna tibatan darmaji baheula. Harita jaman Abah, ukur nilep gemet, anu regana teu sapira. Lebah darmaji alam kiwari mah, bantuan munding kuduna dibikeun lima tapi dibikeunna ukur hiji, upamana. Eta mah saditueun ti darmaji. (Abah Gaul/Abah Gejul)
